استفيدى بصيفك بطريقة رائعة

السلام عليكم ورحمة الله وبركاته
صباحكم / مساءكم هنا وسعادة وايام تدوم بذكر الله
النهارده يا بنات موضوعنا بيتكلم عن الطرق المختلفة لتنظيم اجازة الصيف عشان تستفيدى بيها وكمان تستمعى
النظام كالاتى :
اولا : النوم والاستيقاظ المبكر ، يا بنات متستهونوش بالموضوع ده لأنه بيأثر على النفسية جامد فلو متاخر بيسبب اكتئاب وعصيبة لكن ولو نومك وقيامك بدرى حالتك النفسية بتبقى كويسة
ثانيا : الافطار الجيد ، ليه فوائد مهمة جدا جدا لانه الوجبة اللى بتبنى عليها يومك كله واقتراح ليكى عشان يكون فطار مكتمل وصحى :
1- ساندويتشات متنوعة فيها مختلف العناصر الغذائية
2- كوب لبن اضيفى له ما تريدين الا الشاى لأنه يضيع القيمة الغذائية للبن
3- اى فاكهة تكون متوفرة عندك لأن الفاكهة مفيدة جدا جدا جدا
كده خلصنا الفطار
ثالثا : التدبير المنزلى ، لازم يكون ليكى دور فى البيت وتساعدى مامتك عشان تبقى شاطرة وتعرفى تتحملى المسئولية وحددى شغل معين تعمليه كل يوم
وتلزمى نفسك بيه عشان تتعودى على تحمل المسئولية
رابعا : الترفيه والتسليه ، الحياة مش كلها جد وشغل لازم ليكى وقت ترفيه بالكمبيوتر او التليفزيون ويفضل ان يكون من 3الى 4 ساعات على الاكثر وخصوصا اذا كان على الكمبيوتر او التليفزيون عشان صحتك متتضررش لو اقل تومام مفيش مشاكل
خامسا : القراءة ، وهى هواية عند ناس كتير بس حتى لو مش هواية عندك بردو مهم انك تشترى كتب كتير وتتثقفى منها عشان يبقى عندك معلومات عامة كويسة
سادسا : الخروج ، وبمعنى آخر : الفسح كلنا بنحبها ولازم تكون موجودة من وقت للتانى حتى لو يوم فى الاسبوع تلغى منه كل نشاطاتك وتخليه للفسح بس
سابعا : حفظ القران الكريم ، فى الدراسة حجتنا مفيش وقت فى الاجازة حجتنا
ان احنا ما صدقنا خلصنا من المدرسة لسه فيه حفظ تانى طيب هتحفظى امتى ، حددى لنفسك كمية معينة تحفظيها اوتراجعيها يوميا او اسبوعيا عشان ترضى ربنا وربنا يرضيكى ويباركلك ويرضى عنك
ثامنا : الاهتمام بالنفس ، استغلى تفرغك من الدراسة فى الاهتمام بجمالك اعليى ماسكات للبشرة كلى حاجات مفيدة طول النهار من اللى بننساها واحنا مشغولين بالدراسة زى الجزر والخيار والطماطم والفواكه كل ده مهم جدا ومتوافر عندنا لكن بننساه مع انه اساس جمالك بدل ما تشترى كريمات مممكن تضرك وممكن ما تفيدكيش اعتمدى على اللى ربنا خلقه هتلاقى فيه الحل
تاسعا : الصلاة لازم الى جانب كل الاعمال دى متضيعيش صلاتك يا بنوتة انا عارفة انه المواظبة على الصلاة فى مواعيدها ممكن تكون صعبة بس اضغطى على نفسك علشان ربنا
ملاحظتين على كل الكلام اللى مكتوب فى الموضوع
اولا : الموضوع بقلمى او بكيبوردى يعنى مش منقول
ثانيا : عشان ما تفهموش غلط انا مش ملتزمة بكامل الكلام ده فى حياتى فى حاجات بتقع منى :oops: بس انا قلت اقولكم على نتائج استفادتى من كل الاجازات الماضية ونشد بعض وان شاء الله اصلح الغلطات اللى عندى وانتو كمان كل واحدة تصلح اى غلطة عندها واكيد كلنا عندنا اخطاء اوعى تقولى معنديش مستحيل تبقى كاملة من مجاميعه هههههههههه
واخيرا لكم ارق تحياتى اتمنى ان الموضوع ينال اعجابكم سلام