لو بتخرجي كتير و خايفة تعالي نتعلم سوا الدفاع عن النفس

طبعا في ظل الظروف الحالية و الرعب اللي احنا عايشينه عايزين نعرف كلنا ازاي نقدر نحمي وندافع عن نفسنا وخصوصا ان المدارس و الجامعات على الابواب و البنات هيخرجوا و يروحوا الدروس و يتأخرو وطبعا القلق هيبقى مضاعف اليومين دول

عايزين نعرف نقدر نعمل ايه علشان نحمي نفسنا بقدر الامكان وربنا يسترها معانا

اولا : و قبل كل شيء ربنا هو الحافظ لازم نقرأ اذكار الصباح و المساء بانتظام و نقول ادعية الخروج ونداوم عليها وربنا يحفظنا من كل مكروه .

ثانيا : حاولي تكوني غير ملفتة في مظهرك و خصوصا لو هتمشي لوحدك علشان متغريش ضعاف النفوس بالتعرض ليكي.

ثالثا : بقدر الامكان خليكي في صحبة حتى لو كنتي متعرفيهمش امشي قريب منهم علشان المجموعة بتخوف اي حد انه يقرب .

رابعا : لو هتتأخري بالليل حاولي تتفقي مع والدك او اخوكي او زوجي انه يعدي عليكي ياخدك من اقرب مكان هتكوني فيه .

خامسا : احتفظي بالاشياء المهمة في جيوبك و احرصي ان تستخدمي ملابس لها جيوب بحيث تكون حقيبة اليد مجرد مظهر ولا تحتوي على شيء هام صعب تعويضه اذا تعرضت للسرقة لا قدر الله

سادسا : احترسي من المتسولين بكافة اشكالهم حتى لو واحدة معاها عيل او واحدة تقولك اركب ايه يوصلني فين و الكلام ده . انا عارفة ان الموضوع ده هيكون صعب في االبداية لأننا بطبيعتنا شعب متعاطف و بيصعب علينا اننا منساعدش الناس بس للاسف مفيش حد مضمون دلوقتي وتوقعي اي حاجة من اي حد .

سابعا : دربي نفسك في البيت على الهدوء و عدم الفزع لو تعرضتي لأي موقف لا سمح الله لأن الفزع هيخليكي مش عارفة تتصرفي و كمان اللي قدامك هيعرف كده و هيستغله .

ثامنا : خلي عينك في وسط راسك زي ما بيقولوا ولو حسيتي بأي حركة مريبة تنبهي لو الموضوع ممكن تتصرفي فيه بنفسك (تحرش في الموصلات مثلا ) استخدمي دبابيس الايشارب علشان تردعي اللي قدامك
لكن لو لقيتي الموضوع ممكن يتطور لأكثر من كده اصرخي لطلب المساعدة و الموضوع ده هيخلي الناس تتلم بسرعة

تاسعا : لو لا قدر الله حسيتي بإن حد بيحاول يخليكي تشمي مخدر توقفي فورا عن التفس و اضريبه و حاولي الهرب و هنشوف سوا ان شاء الله ازاي نعمل كده .

عاشرا : مستخدميش اي سلاح للدفاع عن النفس الا لو كنتي متدربة على استخدامه كويس و عارفة ازاي تقدري تحافظي عليه لأنه و ببساطة ممكن يتاخد منك و يستخدم ضدك زي صاعق الكهرباء و المطواة و مسدس الرش .
لو عايزة تستخدمي حاجة و انتي مش متدربة استخدمي رذاذ الفلفل او الاسبراي و الولاعة و طبعا القصافة بالسلاح بتاعها ومبرد الاظافر المعدن و لو بتطولي ضوافرك خليها مدببة بتفرق جامد بجد

الله يحمينا ويبعد عنا اولاد الحرام



احسن حاجه انك تقرأي الاذكار والمعوذات قبل الخروج او من اول ما تصحي من النوم وباذن الله ربنا راح يحميكي ومش ح تحتاجي لاي حد ولا ح تتعرضي لاي اذى

شكرا يا قمرة على الموضوع

برافو عليكى هوة دا الكلام

ميرسى يا قمرات نورتونى

موضوع رائع جداااااااااااااااا

تسلمى يا قمر

جزاكى الله كل خير

نصايح مفيدة جدا ... فعلا الايام دى بقت صعبة اوى

ربنا يحفظنا ويحفظ اولادنا  

ممتاز بجد نصائح في قمه الروعه تسلمي يا قمر وجزاكي الله خيرا

ميرسى لكن والله اسعدتوونى اوووى