الزيتون الاخضر
المقادير
2 كيلو زيتون اخضر تفاحى
1\2 كيلو جزر مبشور
3\4 كيلو ليمون معصور و نشيل االقشر عشان حنحتاجه
1\4 كيلو فلفل اخضر حامى
حزمة كرفس مخرطة
راس ثوم مهروسة بالقشر بتاعها مفيش مشكلة
1 كوب زيت طعام و الافضل لو زيت زيتون
ملح و ميه للتخليل حسب الرغبة
الطريقة
اولا حنجيب الزيتون التفاحى و ده نوعه بيبقى شكل التفاح كده النوع ده حلو و مش بياخد وقت كتير فى التخليل و بيبقى لونه جميل جدا و صفاره حلو زى الكهرمان
لان فيه نوع اسمه العزيزى بتبقى الزيتونة مطاولة شويه و بتاخد وقت فى التخليل اكتر من التفاحى و بتبقى اغمق بعد التخليل
حنغسله و نشقه بالسكينة
و حننقعه فى ميه من الحنفية لمدة 3 ايام كل يوم نغير الميه مرتين مره الصبح و مره بالليل عشان ننزل منه المرارة
بعد ال3 ايام نغسله كويس و نحط عليه كل المقادير اللى فوق ونقلبهم فيه ما عدا الزيت و عصير الليمون و القشر بتاعه
بعد ما نحط المقادير فى البرطمان نحط عصير الليمون و عليه الميه و الملح و و نحط القشر على الوش و نكبس كويس البرطمان و و الاخر نحط الزيت
بعد كده حنحط كيس جوه البرطمان عشان نكبسه كويس
و نحط كيس حوالين الغطا عشان نضمن عدم دخول الهواء و نسيبه 25يوم على ما يتخلل
حنحط كيس من بره البرطمان
لان لما بيقعد يومين تفاعل المكونات بيخلى شوية زيت ينزل من البرطمان فبنحط الكيس عشان الزيت ينزل فيه و مش يبهدل الدنيا
و بنعرف ان الزيتون استوى لما نشوفه لونه اصفر كده التفاحى بياخد حوالى 25 يوم و العزيزى بيياخد من شهر لشهر و نص بس مش بيبقى اصفر قوى كده بيبقى اغمق شويه
يلا جربوا وقولولى رايكم ايه
واللى عاوز الاسود كمان يقول وانا اجيبه
المزاج
وسام النشاط والتميز
وسام الاشراف المتميز
لتنفيذ اقتراحها المهم